sábado, 11 de octubre de 2014

ASAMBLEA DEL 1 D’OCHOBRE DE 2014



 ACTA D’ALCUERDOS

Convocáu un conceyu del colectivu La Madreña con un marxe de tiempu suficiente, al traviés de cauces públicos de comunicación, abiertu a la participación de tol mundu y col orde’l día zarráu, les persones presentes llegamos a los alcuerdos que vienen darréu:

1) DISOLUCIÓN

Alcordamos, nel primer puntu, disolver el colectivu “La Madreña”, esta disolución implica:

El cese de l’actividá de “La Madreña” en tolos ámbitos nos que venía involucrándose: Dinamización cultural y artística, redes de solidaridá, participación y denuncia politiques, ociu alternativu y combativu…

El reaprovechamientu de los recursos materiales, virtuales y económicos per aciu de la donación a otros proyectos, de calter social y políticu, que mientres vivió’l centru tuvieron rellación o collaboraron col mesmu.

El sofitu incondicional a les persones imputaes pola ocupación del espaciu Xeneral Elorza 32.

El compromisu de nun usar el nome de “La Madreña” en futuros proyectos d’ocupación, y de que ninguna persona nin colectivu s’apodere de la herencia simbólica dexada, que ye patrimoniu de tol pueblu asturianu.


No que cinca al comunicáu de disolución, aprébase’l redactáu dos selmanes atrás y difundíu pel corréu internu del colectivu, cola posibilidá d’enmendalu hasta’l llunes 6 d’ochobre. Depués de la so redacción definitiva ha facese públicu’l miércoles 8 d’ochobre.

El documentu ye’l que sigue:

“El 15 de payares de 2011, al cumplise 6 meses del nacimientu del movimientu 15M, fíxose pública la ocupación de l’antigua Conseyería de Sanidá asitiada en Xeneral Elorza 32. Esta acción, promovida pol 15M d’Uviéu y que contó col sofitu de compañerxs d’otres asamblees asturianes tenía, ente más otros, estos oxetivos: Dar un saltu cualitativu nes movilizaciones que veníen dándose. Disponer d’un local nel qu’axuntar y entamar actividaes. Denunciar la especulación y la corrupción y poner en manes de lxs asturianxs esti edificiu envueltu nuna trama d’especulación urbanística conocía como Operación de los Palacios. Asina nació’l CSOA La Madreña que, gracies a milenta persones y colectivos, funcionó como una alternativa real na que disfrutar d’un ociu, una cultura y un xeitu de facer les coses d’otra mena.

Depués del desagospiu del 3 de xunu y depués de varios conceyos, decidimos que lo más funcional ye disolver l’asamblea, yá que yá nun hai un espaciu físicu que xestionar. Queremos dexar claro que’l cese de l’asamblea nun significa qu’equí acabe la pelea, porque vamos siguir lluchando contra la especulación, contra la represión y contra la imposición de la miseria nes nueses vides. Tamién queremos agradecer la implicación y participación de toles persones que fixeron posible que La Madreña funcionare. P’acabar, recordar qu’hai compañerxs imputaxs que tienen abiertos procesos xudiciales y que van necesitar tol nuesu sofitu.

¡Si toquen a una de nós tóquennos a toes! ¡QUÍTENNOS LA MADREÑA, PERO YÁ OCUPAMOS LA CIUDÁ! ¡VÉMONOS NES CAIS! ¡LA LLUCHA SIGUE!”

2) IMPUTACIONES Y DENUNCIA DE LA OPERACIÓN DE LOS PALACIOS

Les persones imputaes pola ocupación de Xeneral Elorza 32 nun queden desarropaes, nin la denuncia de la “Operación de los Palacios” abandonada. Toes dos cuestiones han canalizase al traviés d’un procesu políticu asambleariu y abiertu, pero non por “La Madreña” como tal.

 
3) REAPROVECHAMIENTU DE MATERIALES

Alcordamos distribuir los principales recursos materiales del colectivu de la siguiente manera:

Los dos xeneradores eléctricos de gasolina y el proyector de vídeo van depositase na sé de la CSI d’Uviéu, col consentimientu previu d’esta organización, como ye normal. Ellí han quedar a disposición de la organización y de cualesquier otru colectivu compañeru o iniciativa popular que lu solicite.

La grabadora d’audio y el discu duru virxe van ser entregaos a terceres persones qu’han abonar una cantidá simbólica a la caxa de resistencia de La Madreña.

Los llibros y el material escolar han donase a AMPAs d’escueles y colectivos colos que La Madreña tien collaborao.

Ha consultase a los distintos colectivos y proyectos operativos n’Asturies con calter de centru social, pa valorar si dalguna de les coses almacenaes de les que disponía La Madreña puede se-yos útil.

4) CAXA

Alcordamos axuntar nun solu fondu lo qu’hasta agora yera la “caxa de resistencia” y la “caxa corriente”.

Ha cumplise colos compromisos pendientes de La Madreña, ente ellos delles collaboraciones antirrepresives que nos solicitaron recientemente pa cubrir los gastos xeneraos por multes de calter políticu a dos compañeros.

La cantidá restante va mantenese ensin tocar hasta la resolución del procesu xudicial pola ocupación de Xeneral Elorza 32, pa cubrir íntegramente los gastos posibles que-yos puedan suponer a les persones imputaes en multes y tases xudiciales.

Desque queden resueltes les imputaciones, de sobrar dineru, ha destinase a fondos de solidaridá, a condición de que se destine a fines antirrepresivos, como los fondos del FUSOA, Asturies en Pie, la Ruta Escontra’l Racismu y la Represión o cualesquier otru.

5) REDES SOCIALES.

Alcordamos que la páxina de Facebook, que tien 6.000 seguidores, quede como memoria del CSOA La Madreña y que siga sirviendo de preséu pa la difusión de los movimientos sociales asturianos como hasta agora. Pa evitar enquívocos y dexar constancia de la disolución del colectivu, va solicitase a Facebook cambiar el nome de la páxina a “Info Madreña”. Tamién van desplicase los términos d’usu de la páxina na so descripción.

No hay comentarios:

Publicar un comentario en la entrada