El gallego-asturianu protagoniza una xornada nel CSOA La Madreña

Les Noticies. El vienres 20 de xineru, nel Centru Social Okupáu y Autoxestionáu La Madreña (C/ Xeneral Elorza, 32, Uviéu), va haber una xornada dedicada al gallego-asturianu con una charla y un recital poéticu nesta llingua. La charla va dala Miguel Rodríguez Monteavaro y va empezar a les 20 hores. Nella va tratar de les realidaes socioculturales y sociollingüístiques del Eo-Navia.

Una hora depués, a les 21 hores, Ana Vega, Iván de Cazarón, Pablo X. Suárez, Andresín de Bual, Moises Cima, Xuan Naveiras y el propiu Miguel R. Monteavaro van facer un recital dientro'l ciclu Timba poétika qu'entama Pablo X. Suárez. Van repasar la nueva lliteratura en gallego-asturianu y presentar dalgunes traducciones d’otres llingües.