K-Nalón actúa na entrega de premios del concursu «Amor pola llingua»

Les Noticies. El grupu K-Nalón va dar un conciertu esti xueves, 22 de febreru, a les 21 hores, nel Centru Social Ocupáu Autoxestionáu (CSOA) La Madreña d’Uviéu. Esti conciertu qu’entama Xunta Moza, organización de mocedá de la Xunta pola Defensa de la Llingua Asturiana, en collaboración col CSOA La Madreña, forma parte del actu d’entrega de premios del III concursu lliterariu Amor pola llingua, nel que los y les concursantes declaren el so amor pol idioma nun formatu curtiu de 140 caracteres al traviés de les redes sociales (Facebook y Twitter col hashtag #amorpolallingua), el corréu electrónicu (amorpolallingua@gmail.com) o’l corréu postal.

K-Nalón naz nel 2001 nel valle'l Nalón y agora ta formáu por Delfo y Tori, anque pa esti conciertu van contar tamién cola collaboración especial de Dani Anti-Stylo, músicu de sonadía dientro la escena underground asturiana. La formación de hip-hop asturiana caracterízase por unes lletres contundentes y reivindicatives que canten les miseries de l’Asturies del sieglu XXI.

Xunta Moza, con esti actu folixeru y reivindicativu «quier poner de relieve les actitúes positives a favor del asturianu de la mocedá asturiano, frente a una clas política prexuiciosa y acomplexada pa con esta realidá social y que nun acaba d’asumir con naturalidá lo que ye un fechu incontestable: la existencia de la llingua asturiana y la necesidá de dotar a los sos falantes colos mesmos derechos civiles que tienen los falantes d’otros idiomes». La organización xuvenil quier agradecer la participación nesta tercer edición del concursu y ta contenta non solo pol éxitu nel númberu de participantes, sinón tamién pola calidá lliteraria de los trabayos presentaos. La persona ganadora va dase a conocer nel conciertu y Xunta Moza va entregar un llote de llibros n’asturianu, amás de material de la organización (discos, camisetes, mochiles, material escolar, etc.).